سهنددن شهریارا مکتوب

[*مینا*]

بیر الیمده قلم، بیر الده کاغذ،
خیالیم بوی‌لانیر دام‌دان، دوواردان،
باشیمدا یار باغین گزمک هاواسی،
قاپی‌لار باغ‌لی‌دیر، یول تاپیم هاردان؟



حاصارین دالیندا کؤنول وئردیگیم
او یار بیر باغ سالیب، سویو بلوردان،
هئیواسی کهروبا، ناری یاقوت‌دان،
تاغی فیروزه‌دن، دیوانی گول‌دن.

او، بو احتیشام‌لا، بو طمطراق‌لا
قاپی‌سین اوزومه آچماسا نه وار،
شاه‌لا رعیتین صحبتی توتماز،
من بیر اوبا‌لییام، اودور شهریار.

گرک رخصت آلام حیدر بابا‌دان،
"یوخ" جاوابی بلکه منه وئرمه‌سین،
بیر ده شهریاردان فرمانیم واردیر،
"شاعر بیر-بیرینی اولور گؤرمه‌سین؟"

یوخ، من ده سهندم، باشیم اوجا‌دیر،
ایچیمده سؤنمه‌ین عشق آتشی وار.
منده صفاسی وار گول‌لو باهارین،
باشیمی توتسادا قارا بولودلار.

بیر الیمده اود وار، بیر الیمده سو،
بیر اوزوم قارا قیش، بیری باهاردیر،
دوستا، ایستک‌لییه ایستی قوینوم وار،
دوشمانا باخیشیم شاختا‌دیر، قاردیر.

دووارلار، دووارلار، یول وئرین گئچیم،
وولقانام، نفسیم توفان قوپارار.
بولودام، ساللانسا قاشیم-قاباغیم،
آغلارام، عالمی سئل‌لر آپارار.

آچیلین، آچیلین، باغ‌لی قاپی‌لار،
محبت نامینا، ایستک نامینا!
اریيین، تؤکولون، دمیر قیفیل‌لار،
کؤنول خاطيرینه، اورک نامینا!

گلیر قولاغیما اینیلتی‌لری،
"بوردا بیر شير داردا قالیب، باغیریر"،
دوغرودان دا من بیر "موروووت‌سیزم".
قارداشیم داردا‌دیر، منی چاغیریر.

چکیلین، چکیلین، یول وئرین گئچیم،
اوره‌ییم آلیشیب، آلوو ساچارام!
شهریار بوینونا زنجیر وورا‌لار
چئینرم، گمیررم، دارتیب آچارام!

ایشله‌ییر قولوما دمیر پاخلا‌لار،
زنجیر قیجیقدیریر، سانجیر اتیمی.
جان قارداش، هله‌لیک باغیشلا منی،
دئیه‌سن اونوتدون اسارتیمی.

عزیز شهریاریم، باغیشلا منی،
اینجیمه، داریلما، فیکرین هاردا‌دیر؟
موروووت‌سیز دئییل سنین قارداشین،
آنجاق سنین کیمی اودا داردا‌دیر.

بو گون من سهندم، سن شهریارسان،
گل باشین اوجالداق قوجا تبریزین،
بیر کره یادلارین داشینی آتاق،
چکک قایغی‌سینی اؤز ائلیمیزین.

شاعریم، دونیانی نئجه گؤرورسن،
دوز یئییب، دوز قابین سیندیران‌لار وار.
قدیر بیلن یارا جان قوربان ائیله،
قدیر بیلمه‌یه‌نه حئییف‌دیر ایلقار.

اؤزگه چیراغینا یاغ اولماق بس‌دیر،
دوغما ائل‌لریمیز قاران‌لیقدا‌دیر.
یانیب، یاندیرمایاق یادین اوجاغین،
ائویمیز سویوق‌دور، قیش‌دیر، شاختا‌دیر.

دئمیرم یانمایاق، آلوولانمایاق،
یانماسین، نئیله‌سین یازیق پروانه؟!
یانمایاق وفا‌سیز یارین اودونا،
یاناق ائلیمیزه، یاناق وطنه!

سهند ده گول آچسین، حیدربابادا.
اوزرینده چادیر قورسون شهریار،
باخاق چیچک‌لنن یوردا، شعر یازاق،
شاعر ده بختیار، شعر ده بختیار!
شاعریم، یوبانما، یولدا‌دیر کاروان،
قولاق آس، دونیادا گؤر بیر نه سس‌دیر،
باغرینی سیخماسین آتیلان توپ‌لار،
قیریلان زنجیردیر، سینان قفس‌دیر.

کامیل شعر (http://az.wikisource.org/wiki/%D8%B3%D9%87%D9%86%D8%AF%D8%AF%D9%86_%D8%B4%D9%87% D8%B1%DB%8C%D8%A7%D8%B1%D8%A7_%D9%85%DA%A9%D8%AA%D 9%88%D8%A8)